Jon 1 | ZomZIV | STEP | Amittai tapa Jonah tungah TOPA thu tunga:

Jonah 1

TOPA Kiang Pan Jonah Tai

1 Amittai tapa Jonah tungah TOPA thu tunga: 2 A lian mahmah Nineveh khuapi ah pai inla tua langkhat ah thu hilh in; bang hang hiam cih leh a gitlohna ka mai-ah hong tung zo hi,” a ci hi.

3 Ahi hangin TOPA kiang pan Jonah taikhia-a, Tarshish lam a manawh hi. Joppa ah paisuk a, tua lai-ah Tarshish pai ding tembaw khat a mu hi. A sap a piak khit ciangin tembaw tungah kah a, TOPA taisan dingin Tarshish lam a manawh hi. ^a

4 Tua ciangin TOPA in tuipi tungah huih lianpi sawla, tua huih hat lua ahi manin tembaw a kisia dektak hi. 5 Tembaw hawlte khempeuh lau uh a, amau pasian tung ciatah a kiko uh hi. Tembaw a zangtuam dingin vante tuipi sungah a pai uh hi. ^b

Ahi hangin tembaw sual tungah Jonah kumsukin a ihmu hithiat hi. 6 Tembaw ukpa a kiangah paisukin, “Bangci ihmut thei na hi hiam? Tho inla na pasian samin thu ngen in. Amah in eite hong phawkin hong siasak lo kha thei ding hi,” a ci hi. ^c

7 Tua ciangin tembaw hawlte in, “Hong pai dih un, kua hangin hih tuahsiatna ei tungah hong tung ahi hiam, ai san dih ni,” a kici uh hi. Ai san uh a, Jonah tungah a tu hi. ^d

8 Tua ciangin amaute in, “Hih lungkhamna kua hangin ei tungah hong tung hiam? Nang bang sem na hi hiam? Koi pana hong pai na hi hiam? Na gam bang hiam? Kua mi na hi hiam? ci-in a dong uh hi.

9 Amah in, “Kei Hebrew mi ka hi a, tuipi le leitung a bawlpa vana Pasian TOPA ka bia hi,” ci-in dawng hi. ^e

10 Hih thu in amaute lausak mahmah uh a, “Bang sem khin na hi hiam?” ci-in a dong uh hi. (Amaute kiangah gen khin ahi manin TOPA kiang pana taimang ahilam a theihsa uh ahi hi).

11 Tuipi a kilok pha semsem hi. Tua ciangin amaute in, “Eite adingin tuipi a sip dide nadingin nang bang hong cih ding ka hi uh hiam?” ci-in a dong uh hi.

12 Amah in, “Hong dom unla tuipi sungah hong khia un; tua hileh a sip dide ding hi. Hih huihpi na thuakna uh keima hang hi, cih ka thei hi,” ci-in a dawng hi. ^f

13 Tua sangsikin, leilam manawhin a hih theih tawpun a hot uh hi. Ahi hangin tuipi kilok nasia semsem ahi manin a hih zo kei uh hi. 14 Tua ciangin TOPA tungah kiko uh a, “TOPA aw, hih mipa ka sihsak manun kote hong sisak kei in. Mawhpeng khat a thatin hong ngawh kei in TOPA aw, nangma lunkimna banga na bawl ahi hi,” a ci uh hi. 15 Tua ciangin Jonah domin paikhia uh a, nakpi-a kilok tuipi a sippah dide hi. 16 Hih thu hangin mite in TOPA kihta mahmah uh a, TOPA tungah biakpiakna pia-in ama tungah a kiciam uh hi.

17 Ahi hangin TOPA in Jonah valh ding ngapi khat omsak a, Jonah sun thum le zan thum ngapi sungah a om hi. ^g